Bayelsa don chop Shark pepper soup

Bayelsa United don take correct swagga start dia waka dis season for de Naija League as dem manage knack Sharks 1 kondo for dia house.

Walahi, de match sweet pass bread and butter for all de fans wey watch am becos de two clubs follow diasef tap beta soccer.

Sharks been no wan open dis yarns at all for Bayelsa United, as de kain ball wey dem play no reach make dem lose de match.

Sharks in blue in action © Wizfix

Sharks in blue in action © Wizfix

Foma 3SC skippo, Mutiu Adegoke na hin kon be de wicked man wey score de gol wey wound Sharks for de game.

Sharks try well well make dem ekwalise for de mortuary time, but Bayelsa United no gree for dem and naso de match take kpai.

Warri Wolves also waya Elkanemi Warriors 1 zero for de match wery shelle for Warri.

Sabee strika, Musa Najere na hin score de gol wey Warri Wolves take win de match for de 71st minute.

Elkanemi Warriors even see beta chance wey dem suppose take ekwalise for de 85th minute, but Warri Wolves golkipa, Odah no gree make de ball enta net.

De main katakata match wey shelle for Akure na 0-0 as Enyimba no gree make Sunshine Stars bilala dem today.

E don tey wey Sunshine Stars dey do Enyimba gragra for dia house, but Enyimba do dem shege today for Akure.

Na Thursday Naija League results be dis

Sunshine Stars 0-0 Enyimba

Warri Wolves 1-0 Elkanemi-Warriors

Bayelsa United 1-0 Sharks